O Camiño Portugués detecta miles de peregrinos sen contar
O investigador tudense Alfonso Ferreira presentou o estudo que realizou no Camiño Portugués, nos meses de febreiro, maio, agosto e novembro de 2024. Un acto ao que asistiu o alcalde de Tui, Enrique Cabaleiro, quen se referiu a Alfonso Ferreira como “peregrino excepcional”. Coa súa minuciosa investigación estatística Alfonso Ferreira demostrou que numerosos peregrinos que chegan a Tui polo Camiño da Costa non están contabilizados nas estatísticas oficiais.
Ferreira realizou a súa investigación sociolóxica en dous puntos, a Virxe do Camiño e a Ponte das Febres. Neste traballo, que abarca o fluxo de peregrinos neste cuadrimestre, contabilizáronse un total de 39.546 (871 en febreiro, 14.693 en maio, 21.970 en agosto e 2.012 en novembro), o que suporía unha cifra anual de 118.638 peregrinos. A Oficina do Peregrino da Catedral de Santiago entregou o pasado ano 93.176 “Compostelas” aos peregrinos do Camiño Portugués, o que estaría na liña de estudos que indican que máis do 25% dos peregrinos non cobran a “Compostela”.
Por outra banda, o estudo mostra que o 56% son mulleres e o 44% son homes. Por idades: 20-40 e 40-60 anos, e o 73,5% ten con educación superior. Ferreira contabilizou peregrinos de 73 países. Os estranxeiros son o 57,5% e proceden de Portugal, Alemaña, Italia, EUA, Reino Unido, Brasil, Chequia, Australia, Canadá, Holanda, Polonia ou Irlanda. En canto aos españois, veñen de Andalucía, Madrid, Valencia ou Cataluña.
Dos enquisados, 3.532 (84%) completaron o Camiño Portugués e 702 (16%) chegan a Tui pola ruta oficial en Portugal do Caminho Portugués da Costa. Por outra banda, a gran maioría dos peregrinos enquisados afirman coñecer este Camiño Portugués de Tui grazas ao “boca a boca” e o 91% visitou Tui.
As conclusións deste traballo cuestionan os datos da Oficina do Peregrino do Catedral de Santiago, xa que o 16% chega a Tui polo Camiño da Costa e contabilízanse na ruta por Aguarda e Vigo.
