A Asociación de Empresarios do Camiño de Santiago a Fisterra-Muxía (Solpor) impulsará o proxecto Os últimos viaxeiros, unha iniciativa que pretende poñer en valor a experiencia dos peregrinos que deciden prolongar o seu percorrido máis aló de Compostela para chegar ao finisterrae, reforzando o singularidade de destino e de dar maior visibilidade aos empresarios que fan posible esta recepción final.
Xesús Picallo, presidente da entidade, asegura que buscan "desestacionalizar" o Camiño a través de “promocións para atraer máis camiñantes nos meses de xaneiro a abril e de outubro a decembro, para que tamén poidan gozar da nosa gastronomía e de todo o que ofrece esta ruta xacobea”. Para iso, engade, “estamos perfilando as actuacións en colaboración con Turgalicia».
Picallo destaca que “o Camiño do Solpor é moi máis que unha ruta. É un sentimento que une tradición, paisaxe, hospitalidade e profesionalidade. Esta asociación é a voz de quen constrúe cada día experiencias memorables, dende o rural, con esforzo e autenticidade.
O grupo empresarial, formado por 132 socios, tamén abordou na súa asemblea xeral os problemas que máis preocupan ao sector, como a falta de coordinación no servizo de taxi, o inadecuado estacionamento de autobuses en puntos sensibles do percorrido e a competencia desleal derivada das vivendas turísticas non rexistradas. Tamén coincidiron na necesidade de seguir mellorando a sinalización, dixitalización do destino, a profesionalización do sector e o control da calidade turística.
A asemblea tamén contou coa substitución do secretario da entidade, cargo asumido por Amelia García, en substitución de Águeda María. O resto do consello, presidido por Jesús Picallo, complétano José Antonio González, vicepresidente; Alexia Benlloch, tesoureira; Antonio Loncho, José María López, Caetana Varela, Elena Maceiras e Julio Mateo como vogais; e Begoña Varela, técnica da asociación.
FONTE: O POST GALEGO
